Saturday, November 07, 2009

西先生進院事件簿。

我那位親愛的友,西先生,又進了醫院!據聞他前晚飯後,胃部開始感到痛楚,已心知不妙的他,馬上不回家(!),決定在女友家中渡宿,因為若果有事,都不會驚動到家人(果然深謀遠慮呀吓!)。果然,三更夜半,胃痛變了腸痛,結果當然是進了醫院。

昨天早上,這位大哥致電我,說自己在「仁濟醫院」,而醫生的初步診証是他患了肓腸炎,要割肓腸。述說完進院經過後,我問他是不是飯後在打後空翻?

西先生:唔好玩啦,我好辛苦呀,你一引我笑,我就勁痛勒!
我:我唔信你在醫院囉,除非你大叫護士唻,叫佢拎香腸俾你吃!(關於香腸,是另一個故事,有機會再寫)。
西先生:頂~~~好痛呀,我唔可以笑架!……你知唔知昨晚入院,個亞叔拎套咩衫俾我換呀?
我:?
西先生:係一套童裝囉!頂佢,條褲短到上膝頭,件衫縮到上心口,咩事呀佢老味。
我:(狂笑)著左咪好似變形俠醫變左身咁?你有無大吼呀?有無E起棚牙成條頸都係青筋,作狀想打佢呀?你D腸又有無激到標左出唻呢?
西先生:………唔好再引我笑呀仆街!

西先生昨天下午做了小手術,一切安好。他今早致電我,說好孤獨!叫我呼籲大家去探訪他!!在「仁濟醫院」10S五號床(他真的夠膽叫我寫出來喎)。他說若是他的FANS,就送水果鮮花給他。這張照片,是西先生在病床上的自拍,以mms傳來。怎麼像架步被人掃黃時的狼狽相?

後記:我跟他女友說,你應該前世欠了他囉,今生要來還債!他女友極度認同我的講法。
後後記:後來我有急事(公事)找她女友幫忙,在電話裡的對話:
我:喂你好快D拿拿聲幫我,救命架!
房小姐:吓?!你次次都咁趕,我會俾你嚇死架!
我:好明顯,你前世都應該欠左我,今生要唻還囉。
房小姐:…………………………..