西先生這麼多年來，都當我是人肉字典。有時打電話給我，一開聲就問哪個字怎寫。我總會盡自己的能力教他，不過，有時的情況，也非常讓人焦急，或生氣！
今天的例子：
（一接通電話，就聽到西先生如此說）西先生：喂個棚字點字呀？
我：吓？棚？！（根據經驗，一定要問清楚那個字的用途，否則會更激氣）
西先生：不是呀，是「憑」呀，即係佢憑經驗領先個憑字……(舉例子給我知道)
我：哦，上面係「馮」，下面一個「心」。
西先生：吓？馮？！……
我：（頂！好明顯他是連馮字都不會寫的！！！！）（忍著氣，不能在公司爆炸）兩點，加個馬字呀！
西先生：兩點加個馬？？？（這種反應，擺明他不明白我在說什麼）
我：（默言，深呼吸）點呢，係咪唔識呢又？
西先生：（兩秒後）呀，我諗到勒，我知個馮字點寫勒！
我：………………
總之這種經歷是非常痛苦的，正如你要在電話裡，教人怎用電腦一様，都十分讓人光火。
我好肯定，自己不適宜做老師！
+++++
有天在玩具街看到這個！好勁！！我拍下來，然後拿給西先生看：
我：你鍾唔鍾意呀？
西：唔鍾意喎！你咪買俾我呀警告你！我唔戴架！！
我：唔係喎，好襯你喎。你睇個鐡鍊球，幾有爆炸力！你帶住在地鐡站行一圈，包保即上港聞版呀！
西：我已經好紅啦，唔需要咁樣唻出風頭。你記唔記得我個時戴個假髮在地鐵站亮相先？（一個林亞珍式的假髮，當時大家約好在太子地鐵站相見的，當大伙兒見到西先生的造型後，無一不想死！而整個地鐡站裡，也有幾十人懷著仇視的目光在打量他，應該想打他我估）
我：我記得呀，喂個假髮加埋個鐡鍊波，一定好爆！一於送俾你做聖誕禮物。
西：唔要呀！你俾亞鼠帶啦，佢咁鍾意買鍊戴。
我：…………（心諗：又OK喎）…………
我們在計劃一年一度的「行山大會」，不知道在看的你們，有沒有興趣。暫定是十一月的某個週日，晨早出發，大約午後解散。另一個OPTION是，去燒烤。當然兩個選擇，西先生都會戴那條鐵鍊亮相。
