（一）
鑑於常有讀者朋友傳我電郵，說在不同地方撞見西先生，要求證一下。極度清閒的我，每次收到這些電郵，真會去找他求證。近來的幾次，讀者們遇見的，全部都是他。我跟他說，喂你現在真的好紅啊！他今早跟我說，以後誰要是在街上碰見疑似是他的物體，即管上前打個招呼，他會好識做的………
我：你點識做法先？好似維多利亞時代個d人咁，好有禮物地打招呼？
西先生：無錯勒，即係呢，好似安東尼咁，哩，小甜甜裡面個安東尼呀！我會一隻手打幾百個圈，另一隻手就放在腰後面，然後好似芭蕾舞謝幕咁，屈低個身行禮囉。
我：哇！（狂笑）（因為忽然想到他穿緊身絲襪跳芭蕾舞的樣子）
西先生：不過我知一屈低個身，個d讀者會馬上拎把刀出來捅我囉，仲唔係大好時機呀！
我：俾我都會咁做囉，今日唔隊死你，等幾時呢？！
（二）
西先生一早已跟我揚言想要什麼聖誕禮物了。唉。事關我說，不如（又）送tee-shirt給你啦，他大叫不要。我發覺要激到他嘔血，送tee-shirt給他就可以了。他說想要一隻不知什麼的figure（我忘了名字！），又叫我去旺角兆萬中心找找。我說你想要figure都可以，不過呢，先要經過一輪考驗哦。要知道變態的我，哪有如此順攤呢？他一口答應。
考驗規則是：以後我在電話裡，會無時無刻扮著冤魂，他一聽到鬼叫，就要以口述的槍聲（！）來打倒那個鬼魂。我們叫這遊戲，做「聲音打冤魂」。
（註：何解會是冤魂的聲音呢？因為我每逢上班／午飯／遲下班都是那種厲鬼的哭叫聲，所以西先生叫我「工作間冤魂」。）
今天中午他致電我，我聽到他背景的聲音很安靜，就問，喂你在哪呀？他說在圖書館，有特別任務要做云云。哇，大好時機，我最愛在這種時刻難為他的啦，那麼安靜的地方，玩「聲音打冤魂」，一定會引致他被人活活打死吧？
我：點解你今日要在圖書館做野呢？你家下係咪用張報紙掩住自己，但眼睛個位係剪開左架？嗚嗚~~~~~~（嗯，這個遊戲呢，是要在出奇不意下，來個冤魂出場的！即是說著無關痛癢的東西，可以忽然淒厲地『嗚嗚』聲，扮鬼魂來了）
西先生（細細聲）：哇，頂丫你陰我！『嘭！嘭！嘭！』（好明顯因為地理關係，他不能大聲地開槍）
我（狂笑）：喂，我想問，係咪如果你遇著厲鬼，就會用礔礰炮連環射佢，但如果碰到一隻斯文鬼，你會只用０．３口徑射佢一槍咁多呢？
西先生：我係唔會答你既，因為我知如果我答『係』，今日在圖書館出現既全部都係厲鬼囉！
我：咁得啦，我都可以講你知，個figure我唔會送俾你囉。
西先生：……係！厲鬼的話，我係會連射掃射佢既，仲會用手榴彈添！
我：咁我地今年聖誕節去邊度吃聖誕大餐呢？……嗚嗚嗚嗚（用了很重的聲音，因為係厲鬼囉！）……
西先生：啲啲啲啲啲啲啲啲啲啲！！（一邊以機關槍掃射，自己一邊在圖書館狂笑）（究竟這位大哥想點呢？）
我：變態架你，無人趕你出去咩？
西先生：有呀，我見有人拎住真既機關槍，應該就唻向我發射囉。
我：其實如果我在圖書館，見有人咁仆街咁吵，我會好嬲囉！
西先生：咁你應該係嬲同我傾電話那個人囉。
我：唔係喎，如果唔係你貪心想要禮物，又點會咁呢？
西先生：但街外人唔知我貪心架嘛。
我：咩呀，你個樣已講到俾人知啦，嗚嗚嗚~~~~~（總之任何時間都要扮冤魂）
西先生：……………………………
