時間好像過得特別快，去年與才俊的生日會至今，好像昨天的事一樣｡記得去年yoko自製了一個古古力蛋糕送我倆（生日牌上，寫著138歲！無錯，就是我與bb加起來的歲數了………）｡當時我寫，好想年年都與bb一起吃生日飯，好開心云云｡結果，今年如願以償｡
本來呢，是去唱k的｡西先生還大叫大嚷地說，一於去唱爆佢！｢Lunch-buffet K｣的名字，也是由西先生發起的（不過中午邊吃自助餐，一邊唱k，我是真的沒試過）｡後來當然是｢唔改又改都係改完又改直至唔改再改｣，最後決定去銅鑼灣的｢Town Gas｣｡
（我偉大的）食評：Town Gas的食物好流｡不過服務不錯，環境也ok｡我們好吵好吵，但都沒被趕走，所以呢，以後這個地方還是可以考慮再去的｡完｡
席間有些感動位｡
其一：據聞西先生週六因為敏感症發作，又進了急症室，幸好無大礙｡我跟房小姐說，喂，每次他出事，你都在他旁，你這生都走不了啦｡房小姐聽後，只是傻笑｡
我：喂，如果佢以後塊面都好似敏感咁，一撻撻咁腫晒，成個科學怪人咁，你係咪仲好愛佢呢？
房小姐（思索了半秒）：係！
｢哇~~~~｣，我們即時起哄｡｢哇亞西你執到啦！｣､｢咁好拿拿聲去結婚啦！｣､｢頂你睇佢個様，幾感動！｣然後無良的人們，你一言我一語，不停地轟炸著甜蜜蜜的他倆｡不過鏡頭一轉，是坐他旁邊的房小姐，這時竟落下兩行眼淚｡應該是當時的氣氛，讓她感到更感動吧！（但感動什麼呢？是感動自己可以在西先生變成科學怪人時，還能忠貞地守在他身旁嗎？………有可能喎，科學怪人喎！）
除了西先生這一對外，我們又問才俊何時結婚｡這個問題呢，去年同樣時間，已問過他的了｡
V小姐：BB你真係開心咗好多呀，梗係啦，有人煮飯俾你吃喎｡
西先生：係咩，佢女朋友煮飯佢吃咩？
我：係呀，仲用咗五個鐘去街市買野添呀！
（眾人開始狂笑）
西先生：哇，五個鐘？！買咩呀？成隻牛呀？！
V小姐：咩呀，人地女朋友好認真架，會逐樣問，逐樣學架！
我：所以買完五個鐘既餸後，咪第二日先煮到餐飯囉｡
西先生(結案陳詞)：………BB真係慘｡
我（問BB）：喂，如果第時你女朋友嫁左俾你，佢咪要好早起身？
（BB還未來得及回答，西先生又來搶答）西先生：凌晨四點要起身啦｡煲粥呀，洗衫呀，幫老爺奶奶抺腳呀，又要打掃，幾忙呀｡搞到八點幾，BB起身時，仲要服侍佢，幫佢抺身｡之後去街市打個轉，BB都快收工，咁佢咪開始煮飯囉｡
（聽來好充實，我們不停在狂笑｡BB則沒理我們，一直在吃東西｡這位大哥嚴經我們訓練後，現在我們在胡鬧，他都懶理我們了）
哇，看啊！好厲害！！這是YOKO自製的壽桃蛋糕｡
如果你身邊有朋友既會焗蛋糕，人又SWEET的話，那真是上天給你的賞賜！我們在一輪哇哇聲後，第一個疑問是，｢塊葉吃唔吃得架？｣｡YOKO說可以，而且壽桃的外皮（與樹葉），是冰皮來的！哇，真的超勁！！
內裡是芒果蛋糕，好好吃｡不過呢，我偷望到大家都只吃了少少那個壽桃皮及少少樹葉，因為，質感好古怪！好粉好黐口，像在吃軟軟的粉筆｡但總括而言，是好好吃的｡
四月之星是西先生與V小姐，我問YOKO，到時整怪味蛋糕可以嗎？（V小姐聽到後，就狂鬧我，說，死架你，我生日呀，我唔要怪味蛋糕呀！）
這是eva手製的花束｡好些東西可以買，不過心意買不到｡我好慶幸自己身邊，有這班朋友仔｡我愛你們｡
