跟thomas西先生，提到這個週六去當義工的時間及地點。
今年年頭，我也說過，今年（及以後）要做多點有意義的事，沒有時間，就捐錢，因為幸福不是必然的。我也許太知道自己了，因為時間，我真是欠奉的。時近中秋，想到該出多點力，去回饋社會，前陣子答應了某組織內的朋友，去當義工，派月餅給獨居，兼有自殺傾向的老人家。朋友是個熱心的大好人，今年頭開始，一直服務著該機構（一間具有舒緩老人家情緒困擾及自殺傾向的自願機構）。也時常拉攏身邊的人，去當義工。她，是鼠小姐。
由於鼠小姐是在我們圈中的活躍人物，也是一名烏龍百出的人士，口賤的西先生，與我有以下的對話。阿彌陀佛。
西：唉，你知亞鼠佢幾烏龍啦，陣間去探亞婆，亞婆話口渴，佢會行行下仆親，一杯滾水淋過去架喎。
我：「哎喲，後生女，你做咩淋我呀，辣死我咩？」（我在扮老人家聲囉仲）
西：跟住佢咩亞婆落街睇醫生，點知又碌左落樓梯，等亞婆爆晒缸。
我：「呀，後生女，我條腰呀……」(頂，我又在扮喎，我與西先生是否天生的一對賤人呢？)
西：亞婆都爆晒缸，流血不止就死咁，亞鼠仲唔知係因為自己囉。
我：（狂笑不停）（咩事呢我？！）
+++++
西：喂，我覺得呢，亞鼠應該係成間中心裡面，令老人家死亡率最高既義工囉。
我：（狂笑）你好衰呀把口（但我心裡，也如此想囉……）
西：我估佢地耐不耐要開個ｄ檢討大會既，例如跟開邊個老人家咁，當隔離simon跟果幾個老人家，近況都會寫住：「公公身體幾好」、「婆婆近來好開心」、「公公腳患已痊癒」咁，但亞鼠個牌，係個個case都寫住：「已死亡」、「已死亡」、「已死亡」咁囉。
我：（笑到停不了，流晒眼淚）
西：跟住組長會問，喂，鼠小姐，點解你個接手個d老人家會咁架？亞鼠就答，「其實無咁易死架喎，我都唔知點解我一接手就變成咁……」
我：（同事經過，看到我笑得如此狂，好驚）
+++++
說笑而已。其實鼠小姐，真是頂級的好人，我們都以她為榮呀！
