午飯時間，也是西先生最活躍找我的時間。近來的話題，不外乎都是叫我介紹女孩子給他認識。其實這種請求，大大話話都說了幾年，大哥我又不是淫媒求求你放過我好不好？
話題由介紹女朋友，扯去我們共同認識的某位女子：
西：喂，唔怕架喎，你唔駛驚後果架喎，如果個女仔唔好，我唔會搵你負氣架！
我：吓？！（頂吖，介紹給你難道我還要包你生孖胎？）
西：就好似亞xxxx咁，我有無搵你報仇丫？
（註：xxxx是我們的一個共同朋友，日航空姐來的。當時西先生與她擦出愛之火花，我們全不知情的。但好景不常，他們極速玩完，而且還有點不歡而散喔。亞們。）
我：哇，關鬼我事呀？你同佢拍拖你既事，你自己揀架，又唔係我迫你。去死啦你仲要搵我尋仇？
西：其實你都幾唔話得丫，將佢由地獄帶唻人間。佢明明係地獄使者唻架嘛。
我：！……………（好明顯，西先生對此位女仔，還有萬千的恨啊！唉）
再由那位女子，扯去他的揀偶要求：
西：我好簡單咋，一句：正常得架勒！
我：何謂唔正常先大哥？
西：我唔要肥牛（大大隻那種）；唔要暴龍；最好唔好煩啦（西先生有位前女友，據聞頗黐身）。唔駛太靚，但起碼可以帶出街丫大佬，你之前介紹俾我個ｄ咩唻架？！去打越戰呀？
我：無無無無無無呀，你自己搵啦。
由揀偶條件，談到我們的朋友：
西：咪咁啦，其實好似亞鼠咁，我都ok架勒。
我：亞鼠？！佢高過你架喎。
西：有無d同亞鼠咁上下級數，但矮過我架？
我：你直頭搵亞鼠啦，咪再煩我啦頂。
西：咁你即係叫我同亞鼠搞婚外情唧。
我：（狂笑中）唔係，你地個d唔叫婚外情，你地個d叫「真愛」。
西：即係神既眼睛係雪亮既，只有我地既戀情先係真愛，俗世既眼光無需理會咁呀？
我：係！
然後呢，西先生的牢騷就來了。是不是人到中年（尤其男人），去到某個階段就會常發牢騷呢？西先生開始抱怨，說現代的人愛自圓其說，明明是婚外情，又說什麼相逢恨晚（關鬼我事呀？）；又說現代人只著重包裝，像我如此惡毒的女子，但還竟有那麼多人喜歡，但像他那麼宅心仁厚的男子，卻沒有女子為他付出真愛云云（想點呀大哥燒埋我？！）；還埋怨這個攻利的社會，又說自己待人好，卻得不到回報……。我開始不耐煩起來，吃飯時間才一小時的我，好想快快填飽肚子後，睡一會小覺啊！我有點不客地說：你真的好懨悶！簡直像個撈不起的中年老油條囉！
「喂，你咪再埋怨啦，你快d打938xxxxx啦，會有條中女服侍你，聽你訴心聲架勒！」我催他快掛線，打給亞鼠小姐算了。（後記：西先生真的打給了鼠小姐，而鼠小姐事後在電話裡，狂罵我沒有人性）
