咳咳………有人問起自稱火車頭的Thomas西先生。其實他大哥依然天天有找我，早上八點一通電話，中午十二點一通電話，再加上黃昏六點一通電話。我想，假如有天我突遭意外，離開人世，最難適應及重投生活的，是西先生吧。
今午他一致我，馬上在電話裡大叫「松鼠仔」（他對我的暱稱，但這種暱稱，可以因應他的心情而隨時轉換，有時他叫我「牛頭蛇」，有時他叫我「怪腳蟲」，或者「鯊魚雞」，總之都是動物加昆蟲的混合體。也試過他一開口就叫我「華華姐姐」的，那天我也可以肯定，他有求於我）。他不停大叫「松鼠仔」「松鼠仔」「松鼠仔」，我呢，就不停地「吓？」「吓！」「吓？！」地回應著他，那個「吓」字，最後成了我倆的無聊對答的內容。
我：呀，你想唔想入「藝員特技班」呢？
西：吓？
我：無錯勒，就係首先要訓練咗你個聲「吓」先，我家下俾D不同情景你，你要表達出你既演技，但只能用個「吓」字。
西：好好好。（看來十分愛玩這種遊戲。唉。咩事呢？）
我：有深度既。
西：吓。（刻意裝出磁性的聲音，語氣像梁家輝上身，在拍「情人」一樣。）
我：做梗GYM既。
西：吓！吓！吓！（很大聲很有氣勢，像把二百斤的啞玲舉起一樣）
我：（已有點開始失控地狂笑起來，在公司喎）咁好疑惑既呢？
西：吓？~~~~（扮起小朋友來，聲音像小雞，像有十萬個問題想發問）
我：（笑得想死）咁見鬼既呢？
西：吓哇！！！（馬上裝出逃走的聲音）
我：（此際，已有同事向我投訴，問我「你係咪傻架？」）好，最後一個，係「柔情似水」既吓，咩聲？
西：吓~~吓~~吓~~ （頂，他在唱鍾鎮濤的「表情七日情」呀！！）
我：（爆笑而亡）
+++++
期間提到他的升職試，他說好灰呀，今年應該升職無望了。
我：有幾灰呀？
西：似紙紥公仔咁囉。
我：唓，咁有幾灰唧？
西：俾人拎去燒喎，仲唔變灰呀？
我：妖，係喎。
+++++
掛線後，同事說懷疑我精神失常，要報警………。
