與史泰龍同一下場.........

中午與西先生聊天，提到有一次，他上來我家找我媽針灸，後來我媽說針灸不夠啦，要電療哦。於是翻箱倒櫃，找來一部電療機（可想而知，要翻箱倒櫃地找，就是很久沒用過那機了）。我媽記性欠佳，忽然忘了怎用那機（抑或是有心整估西先生呢，就不得而知），只見她不停將Volume調到無限大，應該是Maximum了，但那機都沒有反應似的。然後他們才發覺，呀頂原來忘記插電掣，於是我媽就去把電掣插好，但請留意，電的volume是沒有調回最小喎（！）。想像到嗎？無錯！西先生當時被強力的電壓輾過，除了大聲的慘叫外，還是慘叫（據聞是整幢樓都聽到的）！相信無良的你妳你，還記得這件事吧？因為這事，一直佔據本站爆笑之事的頭三位。而每次，與他談起這事，我都不知為何地，會狂笑不停。

今天又重提這事。唉。

西先生猶記起那時的慘況，就開始呼冤／吐怨了。
我：你真係好慘囉。
西先生：無呀，唔慘呀，我個半邊身家下都不知幾肌肉發達。
我：好似Hulk咁？
西先生：係呀，只係半邊身囉。你試吓俾一百萬伏特電吓吖，我可以生還，都係奇蹟！
我（己開始狂笑了）：咁其實個時你咩感覺架？
西先生：幾個字，係「從未如此震撼過」。
我：即係點呀？
西先生：就好似你有一個要好女朋友，大家己到談婚論嫁勒，你好愛佢，但有日你發覺，原來佢係一隻狗（！），咁你話係咪震！撼！
我（笑到已想死）：………放過我，可以嗎？………
西先生：你有無睇「第一滴血續集」先？………
（我當時己笑到整個人伏在桌子上，不停流眼水了，好怕有同事突然進來，看到忘了形的我哦！）

西先生（繼續他的呼怨）：咁「第一滴血續集」裡面，史泰龍去咗打越戰，後來俾人捉咗，做咗戰俘。咁d納粹黨要迫佢招供，於是就將佢縛喺一塊電板度，嗱，等我形容吓塊電板先，即係你瞓覺個d床板，但係無床褥既，只有好多彈簧，咁塊床板家下係直立既，史泰龍就被佢地縛喺上面。如果班軍人一開個電掣，成個軍營既電都會被扯過去塊電板度，咁你試諗吓，史泰龍係幾咁慘！佢一被電，就會『呀~~~~~~~呀~~~~~~~~』咁叫，仲有回音既！（說時，西先生即時扮了幾聲被電的大叫聲，當然是全套的，有埋回音）

我：……！！！！！…喂夠勒，放過我，唔該！……！！！！！…（其實當其時，我已笑到有點窒息的感覺了，我不明白這位仁兄，何以真能在公眾場所，如此地慘叫起來。若我是途人，會馬上拍打他的）
西先生：總之個結論係，史泰龍當時有被縛住，所以電佢時，佢無跳起。但我無被縛住，所以當時成個跳起咗！
我：！！！！！！！！！

臨掛線時，我跟他說，喂你不如拍張被電的表情，給我放在網上吧………嗯，他果然是扮嘢之王。