@今早刮大風，在辦公室聽到外面的風聲，像野獸咆哮般。
我：喂好驚呀，你聽吓出面。
同事：唔係呀你，男人老狗！
留意，同事是以"男人老狗"來形容我，忽然覺得自己好威猛。實情是，我在辦公室，常會粗暴地對待同事。但同事們又好開心喎！
@近來早上都以麥包作為早餐，是舊式麵包店裡，那種大大條的麥包。回到公司，吃一半，另一半留給同事。
@中午吃家鄉雞，喝百事。我問同事，喂你喜歡百事還是可口可樂呢？
同事：吓？！我唔識分ｄ味喎。
我：哇咁驚？味覺失調呀你？！（呀我夠膽死這樣話人喎）
同事：你知我對煮嘢吃無研究，又無要求架！
我：即係味覺失調啦！
同事：都話唔係咯，係──無！研！究！
我：費時理你。
@西先生致電我………
西先生：喂，我唔開心呀。
我（本已開了壇，準備在午飯的時間眠一眠，於是有點不耐煩）：點呀，又無帶遮，所以唔開心呀？係咪又沖咗去斯里蘭卡呀？！
西先生：唔係呀，唉。
我：點呀，講啦。
西先生：我覺得生活好平淡，好苦悶囉………。
我：得！明晒，請聽實：生活淡淡似是流水……（即席唱起來）
西先生：………………
我：嗱，你知哩隻歌係邊位唱嘛？而哩位歌星現在又去咗邊呢？
西先生：死咗丫嘛。
我：無錯！你仲唔明呀？！
西先生：你意思即係話，我都仲未悶死，有咩資格出聲？！真要有日悶死，先好打俾你？！
我：係！就係咁勒。你都未死，即係無事啦。做人要知足囉。
西先生：ok，咁得啦，一語道破！無嘢講勒我。………
生活當然是平淡的，哪會天天刺激精彩呢？我們又不是去了伊拉克打戰。如果能在平淡的日常中，去發掘有趣的事情，那才能活得快樂吧。
