開始還債（？）。前陣子與公司in-house的平面設計師Y小姐閒聊，她常在茶水間看到我沖檸茶，就打趣問，你沖的檸茶是否真如傳說中那麼好喝呢？我說，真的（國語）！那時候，我還答應她，要親手給她沖一杯檸茶。
答應了別人做的事情，即使微小，但我非常上心。可能對方都忘了，但我一天未做，一天都會記起。嗯，想來我也算個認真的人，在某些層面上。
今天在茶水間，碰巧遇上她（現在她搬了上樓上，見面的機會不多了），我說，喂不如我現在即席揮毫，沖檸茶你喝啦。然後，就動起手來。
一杯熱騰騰的檸檬茶遞上給她時，她已開始在傻笑（這位小姐很可愛的，明知自己cool了牙，但完全不介意讓人看到她套在牙上的厚厚鋼線）。她喝一口，然後就大叫起來，「哇真係好好飲喎！」嘿嘿，無錯！我華姐的檸茶，真有點超乎奇技的。她幾乎每喝一口，都大讚數句，我呢，則非常的洋洋得意。
我在這裡沒被辭退，大抵，與這杯千金難求的檸茶有關吧？別的秘書沖的，老闆大概只會喝一半啊！
+++++
今早西先生致電我，問我何時去「世博」。我說不知道喎，他又說，不如九月去啦。
西先生：喂你唔知亞視有個節目呢，係講大陸架，好好睇架！個節目名呢……
我：夠！可以入正題未？！我好忙！
西先生：妖，我想話，有幾個館閂左門囉，唔俾大陸人入去呀！
我：吓？！真架？係唔俾同胞入去，定所有人都唔俾入先？
西先生：淨係貼左張告示係中文囉，咁即係唔俾中國人入啦。你知唔知呀，個d大陸人幾狼呀，紐西蘭運左d拍「魔戒」時既佈景同道具去做展覽，有樹呀葉呀咁，你知好真架嘛，咁d同胞係直頭摘ｄ樹葉呀，搣d樹皮落唻做記念囉！
我：唔係咁癲呀嘛？
西先生：堅架！個節目講架。又話丹麥咪送左件國寶美人魚銅塑去展覽既，ｄ同胞直頭在個美人魚背脊刻字，雕住「到此一遊」囉。
我（十級震驚）：哇真架？！？！？！？！
西先生：都話係咯，日本個館都閂左門啦。
我：…………………………………（咁，個節目叫咩名呢？我也想看看）
